ទីបំផុត Beckham សម្រេចក្ដីស្រមៃរបស់ខ្លួន បង្កើតក្លិបបាល់ទាត់មួយនៅអាមេរិក

អាមេរិក៖ ក្ដីសម្រៃចង់បង្កើតក្លិបមួយ របស់អតីតតារាបាល់ទាត់ David Beckham ទីបំផុតបានក្លាយជាការពិតហើយ ក្រោយពីរូបគេធើ្វការសម្ពោធក្លិបថ្មីរបស់ខ្លួន កាលពីម្សិលមិញនេះ។

យ៉ាងណាក្ដី ក្លិបថ្មីរបស់អតីតខែ្សបម្រើ ក្រុមបិសាចក្រហម Manchester United ពុំទាន់មានឈ្មោះរបស់ក្លិបជាផ្លូវការនៅឡើយទេ ដោយសាមីខ្លួនបាននិយាយថា នឹងគិតគូនៅពេលក្រោយ។

ក្លិបដ៏ថ្មីស្រឡាងនេះ មានមូលដ្ឋានក្នុងទីក្រុង Miami រដ្ឋ Florida សហរដ្ឋអាមេរិក ហើយនឹងចូលរួមប្រកួតក្នុងលីក MLS របស់ប្រទេសមហាអំណាចនេះ ក្នុងពេលឆាប់ៗ។  

គម្រោងក្នុងការបង្កើតក្លិបមួយនេះ គឺរៀបចំតាំងពី៤ឆ្នាំ មុនមកម្ល៉េះ។ ប៉ុន្ដែដោយសារតែ Beckham ត្រូវជួបបញ្ហាមួយចំនួន ដូចជា ការស្វែងរកកីឡដ្ឋានដ៏សមស្របមួយ ដើម្បីឲ្យអ្នកជំនួញ វិនិយោគទុន ក្នុងការទ្រទ្រង់ក្លិបឲ្យមានភាពប្រសើរ។

ក្រោយការប្រកាស អំពីការបង្កើតក្លិបនេះ Beckham វ័យ៤២ឆ្នាំ បានមានប្រសាសន៍ថា ៖   

«ខ្ញុំពិតជារីករាយ ដែលបង្កើតក្លិបដ៏ល្អមួយ សម្រាប់ទីក្រុងដ៏អស្ចារ្យ។ ខ្ញុំសន្យាចំពោះអ្នករាល់គ្នាថា នឹងធ្វើឲ្យក្រុមមួយនេះ ក្លាយជាក្រុមខ្លាំងមួយនៅក្នុងលីក» ៕