មនុស្សមួយចំនួនតែងតែនិយាយថា យើងធ្វើការដើម្បីរស់មិនមែនរស់ដើម្បីធ្វើការនោះទេ ការងារមិនមែនចេះតែរកបាននោះទេ បើយើងគ្មានចំណេះជំនាញក្នុងខ្លួននោះ រិតតែមិនគួរអោយជឿទៀតនោះថាការងារខ្លះវាអាចមានមនុស្សធ្វើ ហើយវាអាចមាននៅលើលោកនេះទៀតផង។
ខាងក្រោមនេះ គឺជាការងារមិនគួរឲ្យជឿថាមានទាំង ១០ នៅក្នុងពិភពលោក ៖
១. អ្នកបំពេញកៅអីទំនេរក្នុងកម្មវិធីប្រគល់ពានរង្វាន់ផ្សេងៗ
ដោយសារតែកម្មវិធីទាំងនោះជាកម្មវិធីធំៗ បើមិនមានមនុស្សមើលឫមិនសូវមានមនុស្សច្រើនវាមិនសមនោះទេ។ ដូច្នេះហើយ អ្នកផលិតកម្មវិធីបានជួលមនុស្សទាំងនេះ ឲ្យឈរចាំដើម្បីចូលទៅបំពេញកន្លែងអង្គុយ នៅពេលដែលតារាណាម្នាក់ចាកចេញពីកន្លែងអង្គុយ និងរង់ចាំរហូតពួកគេមក។
២. អ្នកស៊ើបអង្កេតសកម្មភាពចម្លែកៗ (Paranormal Activity)
តាមស្ដាប់មើលទៅ វាហាក់ដូចជាអាថ៌កំបាំងខ្លាំងណាស់ ប៉ុន្តែពួកគេទាំងនោះធ្វើការវិភាគសកម្មភាពចម្លែកៗ (Paranormal Activity) ដោយម៉ាស៊ីនទំនើបៗដូចជា ប្រដាប់វាស់ល្បឿន, ប្រដាប់វាស់សំឡេង និងម៉ាញេទិក ដើម្បីកំណត់អ្វីដែលមើលមិនឃើញ។
៣. អ្នកធ្វើតេស្តពូក
មុខតំណែងនេះ ទាមទារឲ្យពួកគេធ្វើតេស្ដពូក និងកម្រាលពូក។ អ្នកធ្វើតេស្តទាំងអស់ ត្រូវប្រាកដថាពូកនេះមានភាពទន់ល្អ និងផ្ដល់ការឆ្លើយតបផ្ទាល់ខ្លួនដើម្បីជួយឲ្យក្រុមហ៊ុនសម្រេចចិត្ត។
៤. នាងមច្ឆា
តម្រូវការសម្រាប់ការងារនេះមានដូចជា ការស្លៀកពាក់តុបតែងជានាងមច្ឆា, ការរាំនៅក្នុងទឹក និងហែលទឹកជាមួយសត្វសមុទ្រផ្សេងទៀតជារៀងរាល់ថ្ងៃ។
៥. ពិធីករកម្មវិធីដំណើរកម្សាន្ដ
ការងារនេះ មិនត្រឹមតែធ្វើឲ្យពួកគេអាចធ្វើដំណើរកម្សាន្តជុំវិញពិភពលោក និងទំនាក់ទំនងជាមួយអ្នកដទៃនោះទេ ប៉ុន្តែវាថែមទាំងធ្វើឲ្យពួកគេមានឈ្មោះល្បី និងទទួលប្រាក់ខែច្រើនទៀតផង។
៦. អ្នករៀបចំកម្មវិធីជប់លៀង
ជាធម្មតា ការងារនេះតម្រូវឲ្យពួកគេមានបរិញ្ញាបត្រដូចជា ទំនាក់ទំនងសាធារណ, ទីផ្សារ ឬ គ្រប់គ្រងកម្មវិធី ជាដើម។ លើសពីនេះទៀត ពួកគេក៏ត្រូវមានបទពិសោធន៍ជាមុនក្នុងកម្មវិធីសកលវិទ្យាល័យ ឬក្នុងសង្គមផងដែរ។
៧. អ្នកជំនាញភ្លក់ស្រាវីស្គី
ទោះបីជាស្ដាប់ទៅមានភាពងាយស្រួល ប៉ុន្តែការងារនេះតម្រូវឲ្យមានជំនាញជាក់លាក់មួយចំនួនដូចជា អាចដឹងពីភាពខុសគ្នានៃរសជាតិ, ដឹងពីភាពមិនប្រក្រតីរបស់ស្រា ហើយត្រូវយល់ពីក្លិន និងរសជាតិជាដើម។
៨. អ្នកទិញឥវ៉ាន់អាថ៌កំបាំង
អ្នកទិញឥវ៉ាន់អាថ៌កំបាំង បំពេញភារកិច្ចជាក់លាក់មួយចំនួនដូចជា ការទិញផលិតផល, សួរសំណួរផ្សេងៗ ឬធ្វើការត្អូញត្អែរអំពីទំនិញ ឬសេវាកម្ម។ បន្ទាប់មកផ្តល់របាយការណ៍លម្អិតអំពីបទពិសោធន៍របស់ពួកគេ ទៅកាន់ក្រុមហ៊ុន។
៩. អ្នកមើលថែខ្លាឃ្មុំ ផេនដា
អ្នកធ្វើការងារនេះ ត្រូវមានអាយុចាប់ពី ២២ឆ្នាំ និងមានចំណេះដឹងមូលដ្ឋានគ្រឹះមួយចំនួនអំពីសត្វខ្លាឃ្មុំ។ អ្វីដែលសំខាន់បំផុតនោះគឺ ពួកគេត្រូវនៅជាមួយសត្វខ្លាឃ្មុំ ផេនដា ៣៦៥ ថ្ងៃ។
១០. អ្នកធ្វើតេស្ដឱសថកញ្ឆា
ដោយសារតែ ប្រទេសមួយចំនួនបានធ្វើឲ្យការប្រើប្រាស់កញ្ឆាស្របច្បាប់ វាប្រាកដណាស់ថាមានឱកាសការងារជាច្រើនទាក់ទងនឹងវា។ ក្នុងនោះផងដែរ អ្នកធ្វើតេស្តកញ្ឆា ត្រូវមានបរិញ្ញាបត្រផ្នែកគីមីវិទ្យា ដើម្បីប្រើប្រាស់កញ្ឆាជាឱសថ៕
Comments
Post a Comment